先搞清楚一個概念，香港係無所謂「假記者」，係無所謂「非法採訪」嘅。
喺香港，人人都享有新聞自由、享有採訪權。你同我同13歲嘅學生，都可以係記者。
根據《基本法》第二十七條，所有香港居民都享有言論自由、新聞自由及出版自由，《香港人權法案》入面亦都有保障新聞、出版及資訊嘅條文。
新聞自由包括不受政府干預地進行採訪、調查、編輯及評論，而呢項權利，並唔係受薪於商業傳媒機構嘅於新聞從業員先可以享有，而係每個香港人都有嘅基本人權。
簡單講，每個香港人都可以係記者。
香港並無專門嘅法律去規範新聞採訪，「記協」發出嘅係叫會員証，同是否「真」記者係無關係嘅。
咁你可能會問：「嘩，咁即係阿甲阿乙都可以係記者？」係架。「咁咪即係無規管？」係架。
但你問我，我就寧願「無規管」。有一個地方，記者證由政府發出，記者係要取得官方認可嘅資格先可以進行採訪，嗰個地方叫中國。
尤其喺而家呢個亂世，我就寧願多個記者喺現場採訪，多個人、多對眼、多個鏡頭去觀察，等市民知道究竟香港發生咩事，係好重要，亦都係最保障到所有人（包括差佬同示威者）嘅方法。
尋日差佬係有意識地去針對記者，打到你哋唔敢採訪，咁差佬做嘅嘢就俾唔到市民知道，封鎖線後點對示威者﹙又或者行過嘅市民），資訊亦都會掉進黑洞。
講真，打擊新聞自由對差佬亦都無好處——點解差佬多次「澄清」831無打死人都無人信呀？因為你哋當日趕晒啲記者走囉。
咁記者係咪真係無規管呢？其實就係靠市民嘅監察，同記者本人嘅專業操守。正因為個個都可以做記者，因此記者嘅公信力，更要靠記者自己去維持。（所以，點解有記者前輩咁嬲，批評而家有啲網媒記者直播時講粗口及出言挑釁差佬係有損新聞公信力，前輩都講咗咁多，我就唔重覆了）
好想同嗰位13歲嘅記者講，佢專業嘅談吐同行為，無愧對佢件記者衫，比好多所謂嘅大人，更正直、更出色。
#記者證 #13歲記者
圖片：《蘋果日報》截圖
Search